छत्तीसगडमधील दुर्ग जिल्ह्यात अज्ञात लोकांनी दगडफेक करून वंदे भारत एक्सप्रेस ट्रेनच्या खिडक्यांची तोडफोड केली. या घटनेत कोणीही जखमी झाल्याचे वृत्त नाही. रेल्वे विभागाच्या अधिकाऱ्यांनी गुरुवारी ही माहिती दिली. रेल्वे विभागाच्या अधिकाऱ्यांनी सांगितले की, बुधवारी संध्याकाळी दक्षिण पूर्व मध्य रेल्वे (SECR) अंतर्गत रायपूर रेल्वे विभागातील दुर्ग आणि भिलाई नगर रेल्वे स्थानकांदरम्यान अज्ञात लोकांनी वंदे भारत ट्रेनवर दगडफेक केली.
अधिकाऱ्यांनी सांगितले की, बुधवारी वंदे भारत एक्सप्रेस नागपूरहून बिलासपूरच्या दिशेने निघाली होती. दुर्ग ते भिलाई नगर स्थानकादरम्यान पोहोचल्यावर काही लोकांनी ट्रेनवर दगडफेक केली. यामुळे ई वन कोचच्या खिडकीचे नुकसान झाले. या घटनेत कोणी जखमी झाल्याची माहिती नाही. अधिकाऱ्याने सांगितले की, घटनेची माहिती रेल्वे संरक्षण दलाला (आरपीएफ) देण्यात आली आहे. या प्रकरणाचा तपास सुरू करण्यात आला आहे. छत्तीसगडमधील बिलासपूर ते नागपूर (महाराष्ट्र) दरम्यान सुरू झालेल्या देशातील सहाव्या वंदे भारत एक्स्प्रेसला पंतप्रधान नरेंद्र मोदी यांनी रविवारी नागपुरातून हिरवा झेंडा दाखवला.
