श्रीगणेश विसर्जन: कडेकोट सुरक्षा व्यवस्था, अडिच हजाराहून अधिक पोलिस तैनात
नागपूर: गणेशोत्सवानिमित्त शहरातील दहा ठिकाणी विसर्जन व्यवस्था करण्यात आली आहे. यावेळी परिस्थिती हाताळण्यास शहर पोलिस आयुक्त डॉ.भूषणकुमार उपाध्याय यांचे मार्गदर्शनाखाली सुरक्षा व्यवस्था मजबूत केली जाईल. बंदोबस्तात एकूण 2528 पोलिस अधिकारी आणि कर्मचारी तैनात असतील. त्यापैकी 7 डीसीपी, 14 एसीपी, 63 पीआय, 193 एपीआय आणि एएसआय, 1445 पुरुष आणि 229 महिला पोलिस कर्मचारी, 580 पुरुष आणि महिला होमगार्डही तैनात असतील.
फुटाळा, गांधीसागर वर खास लक्ष: यावेळी सुमारे 377 सार्वजनिक गणपतींचे विसर्जन करण्यात येणार आहे. त्याचबरोबर स्थानिकांचे घरचे गणपतीमध्येही मोठ्या संख्येने विसर्जन केले जाणार आहे. यासाठी शहर पोलिसांनी विसर्जन मार्गावर 1 ते 12 सेक्टर तयार केले आहेत. त्यापैकी फुटाळा तलाव, गांधीसागर, नाईक तलाव, कळमना तलाव, सक्करदरा कृत्रिम टँक, सोनेगाव तलाव, कोराडी तलाव, महादेव घाट कामठी, वेना नदी, हिंगणा इत्यादी जागा निश्चित करण्यात आल्या आहेत.
याशिवाय 31 महत्त्वाच्या विसर्जन स्थळांचे व्हिडिओ रेकॉर्डिंगही केले जाईल. दरवर्षीप्रमाणे फुटाळा तलावावर कडक बंदोबस्त ठेवण्यात आला आहे. यात 2 डीसीपी, 2 एसीपी, 6 पीआय, 12 एपीआय आणि एएसआय, 130 पुरुष आणि 45 महिला पोलिस, 65 महिला आणि पुरुष होमगार्ड आणि एसआरपीएफचे 2 सेक्शन तैनातीवर असतील. 27 महिला व पुरुष गृहरक्षकांव्यतिरिक्त क्यूआरटी आणि आरसीपी पथकही राखीव ठेवण्यात आले आहे.
नागरिकांनी गर्दी वाढवू नका: शहर पोलिस आयुक्त डॉ. उपाध्याय यांनी शहरातील रहिवाशांना कोरोना संसर्गाच्या पार्श्वभूमीवर विसर्जनस्थळी गर्दी वाढवू नये, असे आवाहन केले आहे. विसर्जनादरम्यान, नागरिकांनी तोंडाला मास्क, सॅनिटायझर वापर हे उपाय देखील वापरावेत. महाराष्ट्र सरकार आणि पोलिसांनी दिलेल्या माहितीचे अनुसरण करा.
